Қазақстанда рұқсат етілген ең жоғары радиосигнал деңгейі қайта қаралады

ҚР ДСМ Санитарлық-эпидемиологиялық бақылау комитетінің төрағасы –ҚР Бас мемлекеттік санитарлық дәрігері 2025 жылғы 18 сәуірдегі "Радиосигналдың рұқсат етілген шекті деңгейін қайта қарау жөніндегі жұмыс тобын құру туралы" бұйрыққа қол қойды, деп хабарлайды Zakon.kz.

Құжатқа сәйкес, Қазақстанда радиосигналдың рұқсат етілген шекті деңгейін қайта қарау бойынша жұмыс тобы құрылды.

Жұмыс тобына 2025 жылғы 14 мамырға дейін радиосигналдардың рұқсат етілген шекті деңгейлерінің стандарттарын қайта қарау бойынша егжей-тегжейлі іс-шаралар жоспарын әзірлеу тапсырылды.

Біз 2024 жылдың жазында Цифрлық даму министрлігі елдегі байланыс сапасын жақсарту бойынша бірқатар шараларды, соның ішінде базалық станциялардан келетін радиосигналдың рұқсат етілген шекті деңгейінің стандарттарын қайта қарауды ұсынғанын жазғанбыз.

"Қазақстанда стандарттар дамыған елдермен, тіпті көршілес елдермен салыстырғанда 10-20 есе қатаң. Осыған байланысты Денсаулық сақтау министрлігіне озық халықаралық тәжірибені ескере отырып, радиосигналдың рұқсат етілген шекті деңгейінің стандарттарын қайта қарауды тапсыруыңызды сұраймын", -деп атап өтті Қазақстан Республикасының цифрлық даму, инновациялар және аэроғарыш өнеркәсібі министрі Жаслан Мәдиев.