2024 жылы қалдықтар көлемі біршама өсті - статистика

2024 жылы қалдықтар көлемі 11,4% өсті. Бұл жайлы бүгін, 2025 жылғы 6 мамырда ҚР Ұлттық статистика бюросының баспасөз қызметі мәлімдеді, деп хабарлайды Zakon.kz.

Таратылған ақпаратқа сүйенсек, өздігінен шығаратын кәсіпорындардың қалдықтарын ескергенде 2024 жылы жиналған қалдықтардың жалпы көлемі 4,6 млн тоннаны (бір жылда өсім +11,4%) құрады, оның ішінде коммуналдық қалдықтар – 3,8 млн тонна.

"Сұрыпталған қалдықтардың көлемі 2024 жылы 1,3 млн тоннаға жетті, бұл 2023 жылмен салыстырғанда 0,9% артық. Сұрыпталған макулатура мен картонның көлемі сұрыпталған қалдықтардың жалпы көлемінің 10,7%, пластик көлемі – 9,9% құрайды",- делінген ақпаратта.

Өңірлік бөліністе сұрыпталған қалдықтардың көлемі бойынша алғашқы үштік:

• Алматы қаласы – 398,5 мың тонна,
• Қарағанды облысы 237,8 мың тонна,
• Астана қаласы 207,9 мың тонна.

"2024 жылғы мәліметтер бойынша, Қазақстанда коммуналдық қалдықтарды жинауды және шығаруды жүзеге асыратын 811 кәсіпорын мен ұйым жұмыс істейді. Қалдықтарды сұрыптаумен, кәдеге жаратумен және көмумен 227 ұйым айналысады". ҚР Ұлттық статистика бюросы

Бұған дейін Алматыдағы жол бөлігі 20 күнге жабылатындығы хабарланған болатын.