Қазақстандықтар баласына қос фамилия бере ала ма

Бүгін, 2025 жылғы 8 мамырда "Азаматтарға арналған үкімет" мемлекеттік корпорациясы қазақстандық әйелдің болашақ баласының тегіне қатысты қызықты сұрағына жауап берді, деп хабарлайды Zakon.kz.

Азаматтың айтуынша, жұбайы екеуі жақын арада ата-ана атанады.

"Айтыңызшы, балаға менің және күйеуімнің фамилиясын беруге бола ма?", – деп сұрады әйел.

Мемлекеттік корпорация қызметкерлерінің жауабы теріс болды.

"Қазақстан Республикасының "Неке (ерлі-зайыптылық) және отбасы туралы" кодексіне сәйкес баланың ата-анасының тегі әртүрлі болса, онда ата-анасының келісімі бойынша балаға әкесінің немесе анасының тегі беріледі. Баланың тегіне қатысты ата-аналардың арасында туындаған келіспеушіліктер сот тәртібімен шешіледі", – деп хабарлады "Азаматтарға арналған үкімет" мемлекеттік мекемесі.

2025 жылдың 23 сәуірінде мемлекеттік корпорация Қазақстанда некені қалай тіркеуге болатынын түсіндірді.