ҰҚК Қазақстан азаматының ұсталғанын және ірі есірткі зертханасының жойылғанын хабарлады

Таразда есірткі зертханасы жойылды. Бұл туралы 2025 жылдың 20 маусымында ҚР Ұлттық қауіпсіздік комитеті мәлімдеді, деп хабарлайды Zakon.kz.

Ағымдағы жылдың мамыр айында прокуратураның келісімімен ҰҚК қызметкерлері Таразда синтетикалық есірткінің ірі астыртын өндірісін жою операциясын жүргізген болатын.

"Осы қылмысты жасады деген күдікпен Қазақстан азаматы ұсталып, сот санкциясымен қамауға алынды. Тінту барысында 66 келіден астам "мефедрон" психотроптық заты мен 2 тонна прекурсорлар, сондай-ақ есірткі заттарын жасауға арналған зертханалық құрал-жабдықтар табылып, тәркіленді". Қазақстан Республикасы Ұлттық қауіпсіздік комитетінің баспасөз қызметі

Қазақстан Республикасы Қылмыстық кодексінің 297-1 бабы бойынша сотқа дейінгі тергеу амалдары жүргізілуде.

"ҚР Қылмыстық-процестік кодексінің 201-бабының 1-бөлігіне сәйкес өзге де мәліметтер жария етуге жатпайды", – деп толықтырды ҚР Ұлттық қауіпсіздік комитетінің баспасөз қызметі.

2025 жылдың 12 маусымында ҰҚК қызметкерлері Алматыда екі есірткі зертханасын таратқаны белгілі болды.