LRT неге уақытша тоқтағанын тасымалдаушы түсіндірді

Астана LRT баспасөз қызметі 2026 жылғы 17 мамырда пойыздардың неліктен жоспардан тыс тоқтағанын түсіндірді, деп хабарлайды Zakon.kz.

Тасымалдаушының мәліметінше, LRT желісінде жолаушылардың қауіпсіздік ережелерін бұзуына байланысты бірнеше жағдай тіркелген. Мұндай әрекеттер апатты жағдайларға және қозғалыстың уақытша кідірісіне әкелуі мүмкін.

Атап айтқанда, кейбір жолаушылар:

• себепсіз станса платформасындағы шұғыл тежеу батырмасын басқан;
• қорғаныш әйнегінің ішінде орналасқан платформалық есіктерді шұғыл ашу батырмасын іске қосқан;
• вагон есіктерін іштен өз бетінше ашуға тырысқан;
• есіктер жабылған кезде арасына қолдарын тосып, жабылуына әдейі кедергі келтірген.

"LRT жүйесі толықтай автоматтандырылған. Осындай кез келген әрекет жүйе тарапынан қауіпсіздікке төнген ықтимал қатер ретінде қабылданады. Соның салдарынан пойыз тоқтап, диспетчерлік орталық қосымша тексеру жүргізеді. Жолаушылардан LRT пайдалану ережелерін сақтауды сұраймыз. Еске саламыз, желіде жоғары кернеу бар. Әр құрам ішінде LRT пойыздарының операторы болады, қажет жағдайда ол электр қуаты ажыратылғаннан кейін есіктерді ашады", – делінген хабарламада.

LRT баспасөз қызметі барлық құқық бұзушылар стансалар мен вагондардың ішінде орнатылған бейнебақылау камералары арқылы анықталатынын атап өтті.

"Анықталған фактілер бойынша материалдар жолаушылар қауіпсіздігіне қауіп төндіріп, LRT-нің тұрақты жұмысына кедергі келтіргені үшін құқық қорғау органдарына жолданып, кінәлілер қылмыстық жауапкершілікке тартылады", – деп мәлімдеді тасымалдаушы.