ІІМ қазақстандықтарға маңызды ескерту жасады: мұндай SMS-хабарламаларға сенбеңіз

2026 жылғы 23 шілдеде Қазақстанның Ішкі істер министрлігі ведомстволық оқу орындарына оқуға қабылдау туралы жалған SMS-хабарламалар тарап жатқанын ескертіп, азаматтарға үндеу жасады, деп хабарлайды Zakon.kz.

Министрлік алаяқтар қазақстандықтарға жолдап жатқан хабарламаның үлгісін де көрсетті.

"Ішкі істер министрлігі ведомстволық білім беру ұйымдарына талапкерлердің оқуға қабылданғаны туралы жалған SMS-хабарламалардың тарап жатқанын хабарлайды. Бұл хабарламалар – жалған және Ішкі істер министрлігіне ешқандай қатысы жоқ", – деп мәлімдеді ҚР ІІМ баспасөз қызметі.

Ведомствоның мәліметінше, қазіргі уақытта қабылдау науқаны әлі аяқталған жоқ.

"Конкурстық іріктеудің барлық кезеңі әлі аяқталған жоқ. Құжат қабылдау белгіленген мерзімде – 15-25 шілде аралығында жүргізіледі. Қабылдау науқанының қорытынды нәтижелері барлық іріктеу кезеңі аяқталып, қабылдау комиссиялары шешім қабылдағаннан кейін ғана Qyzmet police ақпараттық жүйесіндегі талапкердің жеке кабинетінде жарияланады", – деп хабарлады министрліктің баспасөз қызметі.

Сонымен қатар ІІМ Qyzmet police ақпараттық жүйесі талапкерлердің оқуға қабылданғаны туралы SMS-хабарлама жібермейтінін ерекше атап өтті.

"Осыған байланысты азаматтарды мұндай хабарламаларға сенбеуге, ондағы сілтемелерге өтпеуге, жеке деректерін ешкімге бермеуге және тек Ішкі істер министрлігінің ресми ақпаратына ғана сүйенуге шақырамыз", – деп ескертті ведомство.

Еске салайық, бұған дейін ІІМ жүргізушілерге жаңа медициналық тексеру ережелері туралы тараған қауесеттерге байланысты да үндеу жасаған болатын.