"Қазгидромет" Ақтөбе мен Атырау тұрғындарына ескерту жасады

Ақтөбе мен Атырау тұрғындарына бүгін далада ұзақ жүрмеуге кеңес берілді. Бұған екі қалада күтілетін қолайсыз метеорологиялық жағдайлар себеп, деп хабарлайды Zakon.kz.

Бұл туралы "Қазгидромет" РМК мәлімдеді.

"2026 жылғы 24 тамызда Ақтөбе қаласында күндіз, ал Атырау қаласында түнде қолайсыз метеорологиялық жағдайлар күтіледі", – делінген синоптиктер ескертуінде.

Қолайсыз метеорологиялық жағдайлар – атмосфералық ауаның жерге жақын қабатында зиянды заттардың шоғырлануына ықпал ететін қысқа мерзімді метеорологиялық факторлардың жиынтығы. Олардың қатарына желсіздік, баяу жел, тұман және инверсия жатады.

Мұндай кезде тұрғындарға ашық ауада, әсіресе автокөлік жолдары мен ауаны ластайтын басқа да нысандардың маңында ұзақ жүрмеу ұсынылады. Өкпенің созылмалы аурулары, жүрек-қан тамырлары және аллергиялық сырқаттары бар азаматтар сыртқа шыққанда қажетті дәрі-дәрмектерін өзімен бірге алып жүргені жөн.

Айта кетейік, 2026 жылғы 23 тамызда да Ақтөбеде күндіз, ал Атырауда түнде қолайсыз метеорологиялық жағдай болжанған болатын.