Өзгенің өніміне логотип жапсырған: Asar Baspana ұйымдастырушылары қалай алдаған
Фото: Zakon.kz/Максим Золотухин
Тергеу деректеріне сәйкес, Н.М. Туғанбаев бастаған топ ай сайын 30%-ға дейін табыс табуға уәде беріп, 90 мыңға жуық азаматтан жалпы сомасы 25 млрд теңге жинаған.
Сотталғандар құрылыс материалдарын өндіретін кәсіпорын, тігін цехы, тұрмыстық және медициналық техника зауыты жұмыс істеп тұрғанын айтып, салымшыларды жаңылыстырған.
Шын мәнінде, өнімдер өзге жеткізушілерден сатып алынып, оларға Asar Baspana логотипі жапсырылған.
2024 жылғы желтоқсаннан бастап азаматтардың пирамида қызметіне деген сенімі төмендеген соң, ұйымдастырушылар автодүкендер ашылғаны және дилерлермен ынтымақтастық орнатылғаны туралы жалған ақпарат таратқан. Іс жүзінде көліктер салымшылардың ақшасына сатып алынып, ұйымдастырушылардың туыстарының атына рәсімделген.
"Сот үкімімен Н.М. Туғанбаев 8 жылға бас бостандығынан айырылды. Тағы үш ұйымдастырушының әрқайсысына 7 жылдан бас бостандығынан айыру жазасы тағайындалды. Өңірлердегі 13 жетекшінің әрқайсысы шартты түрде 5 жылға бас бостандығынан айырылды", – деп хабарлады ҚР Қаржылық мониторинг агенттігінің баспасөз қызметі.
Сонымен қатар тыйым салынған, жалпы құны 5,6 млрд теңге болатын активтер жәбірленушілерге келтірілген залалды өтеуге бағытталады. Мүліктің қалған бөлігі мемлекет кірісіне өткізіледі.
Үкім заңды күшіне енген жоқ.
2026 жылғы 18 қыркүйекте Қарағанды облысында CVK қаржы пирамидасының құрылымдық бөлімшесін ұйымдастырған С.Ш. Қайырбаева мүлкі тәркіленіп, 2 жылға бас бостандығын шектеу жазасына сотталған еді.
