Жамбыл облысындағы ауылдардың бірінде мал жаппай қырылып жатыр
Сурет: видеодан скриншот
КТК арнасының мәліметінше, Майтөбедегі малшылар бұлай жалғаса берсе, қу таяқ ұстап қалар түріміз бар деп қабыл қағып отыр. Өйткені өріске кеткен тұяқтылар өлексеге, келгені көтерем күйге түсіп жатыр.
"Білмей сауып ішіп жатқан ел бар. Адам ауырмай ма?! Біз қалай үндемей отырамыз.? Дезинфекция жасамаса, болмайды. Бұл кене арқылы да, шөп арқылы да, су арқылы да келуі мүмкін". Рима Әбдиева
Ауылдағылар аты анықталмаған ауру адамға да жұға ма деп алаңдаулы. Кесел тиген төрт түлік тәуліктеп жем-шөп жемейтін көрінеді. Жатқан жерінен тұрмайды, қызуы төмен түспейді. Бұқара бұған көктем кезіндегі вакцина науқанының немкетті ниетпен жүргізілуі де себеп болуы мүмкін дейді.
"Температурасы 41-ге барады. Егер де білмей қалсаң, өледі. Қолымыздан градусник түспей жатыр". Бақтыбай Есенбаев
Ал аудан билігі бұл сары ауру тектес кеселдің бірі болуы мүмкін дейді. Өлекселер мен олардың азығынан сынама алып Алматыға жөнелткен. Нәтижесі келмейінше, мал дәрігерлерлері диагноз қойып, шешім шығара алмайды.
Жамбыл облысы ветеринария зертханасына жібереміз. Олар теріс деп береді. Қандай диагноз қоярымызды білмей отырмыз. Лептоспироз ауруына күдікті деп беріп жатырмыз. Бірақ нақты емес. Ал референц орталықтың айтуынша, дәрідәрмек салынбасын, сол кезде анықталады деп отыр. Жарқын Қалмаханов, Талас ауданы ветеринария стансасының директоры
Қырылған малдың нақты қанша екені белгісіз. Себебі ресми хаттама жасалмаған. Ал Алматыда қаралып жатқан сараптама қорытындысы бір-екі аптада шығуы тиіс.
