Астанадағы LRT құрылыс кезінде қисайып қалды

10 қараша күні сағат 17:00 шамасында Қалдаяқов көшесіндегі LRT құрылыс алаңының аумағында бетон құйылды. Белгілі болғандай, қалып бұған шыдамай қисайып қалған, деп хабарлайды Zakon.kz.

LRT баспасөз қызметінің хабарлауынша, бетон құю кезінде және қалыптардың болттармен жалғауларына жүктеме ұлғайған кезде темірбетон тіреуіш шыдамай, қисайған.

"Қазір бұл аумақта көлік қозғалысын шектеу шарасы қабылданып жатыр. Ешқандай қирау қаупі жоқ. Қалпына келтіру жұмысы ертең күндіз аяқталады", - делінген хабарламада.

Бұған дейін қазан айында LRT құрылыс алаңында бұрғылау қондырғысы құлап, көлікті басып қалған еді. Төтенше жағдай Сығанақ көшесінде 21 қазанында болды.