Алматы облысында шағын автобус түгі қалмай өртеніп кетті

Алматы облысының Бесқайнар ауылында шағын автобус толығымен өртеніп кетті. Бұл ақпаратты Zakon.kz сайтына облыстық ТЖД нақтылады.

8 маусым күні сағат 10:15-те Талғар қаласының ӨСБ-2 байланыс желісіне Бесқайнар ауылының Центральная көшесінде автокөліктің өртенгені туралы хабарлама келіп түскен.

"Оқиға орнына шұғыл жеткен өрт сөндірушілер Mercedes Sprinter маркалы көліктің толықтай отқа оранғанын анықтады. Өрт алаңы 14 шаршы метрді құрады. Өрт сағат 11:02-де жойылды". Алматы облысы ТЖД

Құрбандар мен зардап шеккендер жоқ. Оқиғаның себебі анықталу үстінде. Қызыл жалынмен Алматы облысы ТЖД-ның төрт қызметкері және бір бірлік техникасы күресті.

Айта кетсек, 8 маусымда Атырауда жолда шетелдіктер мінген жеңіл көлік өртенді.