Алматыдағы сауда орталығында оқушылар жаппай төбелесті

Желіде жасөсірімдердің сауда-ойын-сауық орталығының фудкортында төбелесіп жатқан бейнесі тарады. Оқиғаға қатысты полиция мен Алматы қаласының Бала құқықтары жөніндегі уәкілі түсініктеме берді, деп хабарлайды Zakon.kz.

Желіде тараған бейненің жазбасына сүйенсек, 20 ақпанда № 178, 181 және 209 орта мектеп оқушылары жаппай төбелес өткізді. Оның қатысушылары полицияға арыз жазбауға өзара келісім жасағанымен, тараптардың бірінің өкілі келісімді бұзған. Нәтижесінде 181 және 209 мектеп оқушылары ұсталды. Бұл ретте, ата-аналар жасөспірімдерді соттың шешімінсіз арнайы мектепке жібергендеріне наразы.

Оқиғаға түсініктеме бере отырып, Алматының балалар омбудсмені Диана Ерлан іс жүзінде қылмыстық іс басталғанын, тергеу амалдары жүргізіліп жатқанын атап өтті. Жасөспірімнің заңды өкілдеріне 127-бап 3-бөлім (кәмелетке толмағанның құқықтарын және (немесе) мүдделерін қорғау, қауіпсіздігін қамтамасыз ету жөніндегі шараларды тәрбиелеу және (немесе) білім беру жөніндегі міндеттерді орындамау) бойынша әкімшілік хаттамалар жасалды.

"Мен прокуратураға кәмелетке толмағандардың арнайы білім беру мекемесіне орналастырылуын құқықтық бағалауға қатысты сұрау салдым. Бүгін прокуратура балаларды арнайы мектепке орналастыру туралы қаулының күшін жойды", – деп толықтырды Диана Ерлан.

Алматы ПД баспасөз қызметі Алатау аудандық полиция басқармасының бұзақылық фактісі бойынша қылмыстық іс қозғағанын хабарлады.

"Жанжалдың барлық қатысушылары анықталып, полицияға жеткізілді. Олардың әрқайсысының іс-әрекеттеріне құқықтық баға беріліп, ҚР заңнамасына сәйкес шаралар қабылданатын болады. Сонымен қатар, балаларды тәрбиелеу жөніндегі міндеттерді орындамағаны үшін қылмысқа қатысушылардың ата-аналары жауапқа тартылды. Жасөспірімдер оқитын жалпы білім беретін мекемелердің әкімшілігіне қылмыс жасауға ықпал еткен себептер мен жағдайларды жою жөнінде ұсыныстар жіберілді. Оқиғаның барлық қатысушылары есепке алынды", – делінген түсініктемеде.

Бұдан басқа, қылмыстық істің әрбір фигурантына арналған материалдар Алатау ауданы әкімдігі жанындағы кәмелетке толмағандар істері жөніндегі ведомствоаралық комиссияда қаралатын болады.

Бұған дейін Алматыда бір жарым мыңнан астам мопед тіркелгендігі хабарланған болатын.