Астаналық арзан бағада жолдама аламын деп алаяққа алданды

Есіл аудандық криминалдық полиция бөлімінің қызметкерлері 30 жастағы елорда тұрғынын алаяқтық жасады деген күдікпен ұстады.

Тергеу барысында күдіктінің 22 жастағы қала тұрғынының ақшасын алдау арқылы иемденгені анықталды. Ол жәбірленушіге Филиппинге жолдама алып беруге уәде беріп, толық соманы алған.

Алайда, өз міндеттемелерін орындамаған күдікті жәбірленушіні алдап, оны жолдамасыз және ақшасыз қалдырған. Жас жігіт бұл туралы полицияға шағымданып, келтірілген шығын 500 мың теңгеден асқаны белгілі болды.

Күдікті жауап алу барысында кінәсін мойындап, алынған ақшаны өз қажетіне жұмсағанын айтты. Оның сөзінше, ол өзінің танысының сенгіштігін пайдаланып, оны әпкесі туристік агенттікте жұмыс істейді деп сендіріп, арзан жолдама алып беретінін уәде еткен.

Қазіргі уақытта аталған дерек бойынша алаяқтық бабымен қылмыстық іс қозғалды. Полиция азаматтарды мұқият болуға және алаяқтардың құрбанына айналмас үшін бейтаныс адамдарға сенбеуге шақырады.