Атырау мен Дубай арасындағы әуе рейстері тоқтатылды

2025 жылдың 20 маусымында "Эйр Астана" Атырау мен Дубай арасындағы рейстерді тоқтатқанын мәлімдеді, деп хабарлайды Zakon.kz.

"Эйр Астана 28 маусымнан бастап Атырау-Дубай бағыты бойынша ұшу уақытының айтарлықтай ұлғаюына байланысты рейстердің уақытша тоқтатылатыны туралы хабарлайды. Астана мен Алматыдан Дубайға ұшатын рейстер Иран мен Ирак аумағын айналып өтуді жалғастыруда", – делінген хабарламада.

Тоқтатылған рейстердің жолаушыларына Алматы мен Астанадан Дубайға немесе Атыраудан басқа бағыттарға тегін қайта брондау немесе әуе билеттерінің құнын толық қайтару ұсынылады.

Бір күн бұрын, 19 маусымда Wizz Air Abu Dhabi Астана мен Абу-Даби арасындағы рейстерді тоқтатқанын хабарлады. БАӘ мемлекеттік Flydubai әуе компаниясы да Қазақстанға рейстерін тоқтатты.

2025 жылдың 13 маусымында Air Astana мен FlyArystan жолаушыларға Иран мен Ирактың әуе кеңістігін айналып ұшу туралы ескертті.