Алматы маңында Honda қатысқан жантүршігерлік жол-көлік оқиғасында жеті адам қаза тапты

Алматы – Бішкек автожолының 129-шы шақырымында өлімге әкелген жол-көлік оқиғасы (ЖКО) болды. 2025 жылғы 2 желтоқсандағы дерек бойынша, жеті адам қаза тапты, деп хабарлайды Zakon.kz Алматы облысы полиция департаментінің баспасөз қызметіне сілтеме жасап.

Алдын ала ақпарат бойынша, Honda Odyssey жүргізушісі алдында келе жатқан HOWO жүк көлігінің тіркемесіне соқтығысты.

"Жол-көлік оқиғасының нәтижесінде жеңіл көлікте болған жеті адам, оның ішінде жүргізуші, алған жарақаттарынан қайтыс болды", – делінген Алматы облысы полиция департаментінің баспасөз қызметінің хабарламасында.

Қазіргі уақытта оқиғаның барлық мән-жайын анықтау мақсатында сотқа дейінгі тергеу жүргізілуде.

Айта кетейік, жақында дәл осы трассада тағы бір апат болып, алты адам қаза тапқан. 25 қарашада 23 жастағы Audi жүргізушісі рульді басқара алмай, Toyota көлігіне соқтығысқан. Апат нәтижесінде екі жүргізуші және үш жолаушы оқиға орнында көз жұмды, тағы бір жолаушы ауруханаға жеткізілгенімен, дәрігерлердің барлық күшіне қарамастан қайтыс болды. Сонымен қатар, бес жолаушы әртүрлі жарақаттар алып, ауруханаға жатқызылды.