Алаяқтардың арбауына түспеу үшін: тұрғын үйді жалға алу кезіндегі сақтық шаралары

Қазақстан полицейлері тұрғын үйді жалға беру кезінде қолданылатын алаяқтықтың жаңа тәсілі туралы ескерту жасады, деп хабарлайды Zakon.kz.

Абай облысы полиция департаменті азаматтарды интернет-алаяқтықтың жаңа түрлерінен сақ болуға шақырды.

"Әсіресе әлеуметтік желілер мен хабарландыру сайттарында тұрғын үйді жалға беру туралы жалған хабарландырулар жиі кездесіп жатыр", – деп ескертті тәртіп сақшылары.

Полицейлердің айтуынша, алаяқтардың әрекет ету тәсілі мынадай:

• әлеуметтік желілер мен хабарландыру платформаларында демалыс үйлерін жалға беру туралы жалған хабарландыру жариялайды;
• әлеуетті клиенттерге тұрғын үйдің "бос тұрғанын" айтып, тартымды фотосуреттер жібереді;
• сенімге кіру үшін интернеттен алынған нақты мекенжайлар мен нысандардың суреттерін пайдаланады;
• бронь қою үшін алдын ала төлем талап етеді;
• ақшаны алған соң үйде жөндеу жүріп жатқаны, техникалық ақау шыққаны немесе басқа да сылтауларды айтып, тапсырыстың орындалмайтынын хабарлайды;
• кейін байланысын үзіп, хабарсыз кетеді.

"Алаяқтар адамдардың демалысын тез ұйымдастыруға асығып, ақпаратты мұқият тексермейтінін пайдаланады. Соның салдарынан азаматтар қаржылай шығынға ұшырауы мүмкін", – деп ескертті полиция.

Осыған байланысты тәртіп сақшылары мынадай сақтық шараларын ұстануға кеңес береді:

• бейтаныс адамдарға алдын ала төлем жасамаңыз;
• тек ресми брондау платформаларының немесе сенімді агенттіктердің қызметіне жүгініңіз;
• жалға берілетін нысан туралы ақпаратты тексеріңіз. Мекенжайды карта сервистері мен ресми дереккөздер арқылы нақтылаңыз. Егер күмән туындаса, бронь жасаудан бас тартыңыз;
• фотосуреттердің түпнұсқалығын кері іздеу (reverse image search) арқылы тексеріңіз. Алаяқтар көбіне интернеттен алынған суреттерді пайдаланады;
• байланыс деректеріне назар аударыңыз. Ресми құжаттардың болмауы және тек бір ғана телефон нөмірінің көрсетілуі күмән тудыруы тиіс;
• тым арзан ұсыныстардан сақ болыңыз. Нарықтағы бағадан айтарлықтай төмен баға көбіне алаяқтықтың белгісі болады.

Айта кетейік, Алматы облысында тәуліктік жалға берілетін тұрғын үйге қатысты 500-ден астам жалған хабарландыру бұғатталған.