Алматы тауларында сел қаупі: тұрғындар мен туристерге маңызды ескерту жасалды

Алматы қаласының тұрғындары мен қонақтарына тауға барудан уақытша бас тартуға кеңес берілді. Бұл туралы қалалық Төтенше жағдайлар департаменті мәлімдеді, деп хабарлайды Zakon.kz.

"Қазгидромет" ұсынған дауылды ескертуге сәйкес, 2026 жылғы 1 шілдеде Алматының таулы аймақтарында қатты жауын-шашын күтіледі. Соған байланысты Кіші Алматы өзені алабында сел жүру қаупі жоғары.

"Қолайсыз ауа райына байланысты туристерді, қала тұрғындары мен қонақтарын жағдай тұрақталғанға дейін Іле-Алатауы мемлекеттік ұлттық табиғи паркінің таулы аумағына бармауға шақырамыз, – делінген Төтенше жағдайлар департаментінің хабарламасында.

Құтқарушылар сел қаупі бар аймақта жүрген азаматтарға мынадай сақтық шараларын ұстануды ұсынды:

• таудағы ахуалға қатысты ресми ақпараттарды тұрақты қадағалау;
• сел жүру қаупі төнген жағдайда дереу биік әрі қауіпсіз жерге шығу;
• өзен арналарының бойында, сел жүруі мүмкін сай-салаларда, бөгеттердің үстінде немесе етегінде шатыр құрмау және аялдамау;
• таудың жоғары бөлігінде нөсер жауын жауса, өзен арнасынан және қауіпті аумақтан бірден кету.

Бұған дейін синоптиктер 1 шілдеге байланысты еліміздің бірқатар өңірінде дауылды ескерту жариялаған болатын.