Threads арқылы концерт билеттерін сатқан: астаналық жігіт алаяқтық жасады деген күдікке ілінді
Фото: freepik
Алдын ала мәлімет бойынша, күдікті әлеуметтік желіде концерт билеттерін сату туралы хабарландырулар жариялаған.
"Хабарландыруға қызығушылық танытқан азаматтар билет үшін ақша аударған. Қаражат күдіктінің танысына тиесілі банк шотына түскен. Алайда жәбірленушілерге ақысын төлеген билеттері берілмеген", – деп хабарлады Астана қалалық полиция департаментінің баспасөз қызметі.
Жедел-іздестіру іс-шаралары барысында күдіктіден заттай дәлелдемелер, соның ішінде ұялы телефон тәркіленді. Алдын ала мәліметке сәйкес, ол осы телефон арқылы хабарландырулар жариялап, сатып алушылармен хат алмасқан.
Аталған дерек бойынша сотқа дейінгі тергеп-тексеру жүргізіліп жатыр.
"Оқиғаның барлық мән-жайы, келтірілген залалдың мөлшері және өзге де ықтимал жәбірленушілер анықталып жатыр", – делінген полиция хабарламасында.
Құқық қорғау органдары азаматтарды әлеуметтік желілер арқылы билет сатып алғанда сақ болуға шақырды.
Ақша аудармас бұрын хабарландырудың шынайылығын және сатушының деректерін тексеру ұсынылады. Өйткені интернеттегі тартымды ұсыныс ақысын төлеген тауарды немесе қызметті алуға әрдайым кепіл бола бермейді.
Бұған дейін алаяқтардың адамдарды алдаудың жаңа тәсілдерін ойлап тауып, ықтимал құрбандарына көршілерінің атынан хабарлама таратып жатқаны туралы жазған едік.
