Алматы облысында жеңіл көлік бар жылдамдығымен ағашқа соғылып, үш адам қаза тапты

Алматы облысында жүргізуші рөлге ие болмай, жолдан ұшып кетіп, бар жылдамдығымен ағашқа соғылған. Салдарынан көліктегі үш жолаушы оқиға орнында көз жұмды, деп хабарлайды Zakon.kz.

Қайғылы оқиға 21 наурызда Алматы-Жетіген тас жолының 29 шақырымында болған.

"Toyota Camry көлігінің жүргізушісі әртүрлі дене жарақаттарымен ауруханаға жатқызылды. Аталған факт бойынша қылмыстық іс тіркелді, болған оқиғаның барлық мән-жайы анықталуда",- деді өңірлік полиция департаментінің баспасөз қызметі.

Құқық қорғау органдары жүргізушілерге жол қозғалысы ережелерін сақтау, белгіленген жылдамдық режимін бұзбау, сондай-ақ жолдарда шалт маневр жасаудан аулақ болу қажеттігін еске салады.

Бұған дейін 2025 жылдың 18 наурызында  Алматыда 16 жастағы мопедші жол апатына ұшырап, ауыр жарақат алғанын жазғанбыз.