"Манчестер Юнайтед" - "Астана" матчы 1:0 есебімен аяқталды
zakon.kz коллажы
Манчестердегі "Олд Траффорд" стадионында "Манчестер Юнайтед" пен "Астана" ойнады, деп хабарлайды Zakon.kz.
Бірінші таймда гол соғылмады. Екінші таймның басында "Астана" ойыншыларының анда-санда қарымта шабуылдарға шығатын мүмкіндігі болды.
Қазақ клубын әбден қыспаққа алса да гол соға алмаған "қызыл сайтандар" 66-шы минутта алаңға Лингард пен Матаны шығарды. Ал 73-ші минутта Гринвуд Мейсон қорғаушы Ротариуды алдап өтіп, ағылшын жанкүйерлерінің ұзақ күткен голын салды.
"Манчестер Юнайтед" бүкіл ойын бойы шабуылда болды, Ненад Эричтің еңбегі болмағанда, "Астананың" ірі есеппен ұтылатаны анық еді.
L тобының қатар өткен ойынында Сербияның "Партизаны" өз алаңында Голландияның "АЗ Алкмарымен" 2:2 есебімен тең түсіп, ұпай бөлісті.
Еуропа лигасы топтық кезеңінің екінші туры 3 қазанда өтеді: "Астана" Нұр-Сұлтан уақытымен сағат 20:50-де өз алаңында "Партизанды" қабылдайды, екі сағаттан кейін Голландияда "АЗ Алкмар" - "МЮ" кездесуі басталады.
