Қазақстанда жалға заңсыз берілген пәтерлер анықталды

zakon.kz

"Учаске" жедел-профилактикалық іс-шарасы жалғасуда.

ІІМ ресми өкілі Нұрділдә Ораз "Учаске" шарасы кезінде полицейлер 29 мыңнан астам жалдамалы пәтерге тексеріс жүргізгенін мәлімдеді, деп хабарлайды zakon.kz тілшісі.

Құқық бұзушылықтың алдын алуға және қоғамдық қауіпсіздікті қамтамасыз ету мәселелерін зерттеуге және одан әрі шешуге бағытталған "Учаске" жедел-профилактикалық іс-шарасы жалғасуда, дейді Нұрділдә Ораз.

Оның айтуынша, учаскелік полиция инспекторлары тұрғындармен танысу, атыс қаруының иелерін және тіркелген шетелдік азаматтарды тексеру үшін аулалар мен үйлерді аралап жүр.

Қыркүйек айында учаскелік офицерлер 1,7 млн-ға жуық пәтер мен жеке үйлер, 130 мыңнан астам саяжайлар мен 33 мыңға жуық шаруа қожалықтары мен қыстақтарды тексерді. 29 мыңнан астам жалдамалы пәтер тексерілді, онда үйді мемлекеттік кірістер органдарында тіркеусіз жалға берудің 5 мыңға жуық фактісі анықталды, деді ІІМ ресми өкілі.

Сондай-ақ, министрліктің мәліметінше, 92 мыңнан астам азаматтық қару иелері тексеріліп, олардың 1,2 мыңға жуығы қаруды сақтау ережелерін бұзғаны анықталды.

Шара басталғалы полиция қызметкерлері 200 мыңға жуық әкімшілік құқық бұзушылықты тіркеп, оның ішінде ұсақ бұзақылықтың 3,5 мың фактісі, 4,3 мың үй тұрмысында құқық бұзушылығы, 30 мыңнан астамы - көші -қон заңнамасын бұзған, деп қорытындылады Ораз.

Жайна Тәттімбетова

Оқи отырыңыз