"Реалдың" бас бапкері жаңадан тағайындалды

26 мамырда әлемдегі ең беделді футбол клубы - мадридтік Реал испандық Хаби Алонсоның өздеріне бас бапкер болып тағайындалғанын жариялады, деп хабарлайды Zakon.kz.

43 жастағы бапкер қол қойған келісімшарт 2028 жылдың ойын маусымы аяқталғанға дейінгі мерзімге бекітілген. Алонсо 1 маусымда жаңа қызметіне кіріседі.

"Сәлем, мадридтіктер, ал мен келіп қалдым. Толқу мен энергияға толы жаңа дәуірді өздеріңмен бастауға өте қуаныштымын. Баршаңа сәлем. Алға, Мадрид", - деді Хаби Алонсо.

Соңғы екі маусымда Алонсо 2024 жылы Бундеслига мен Германия кубогын жеңіп алған неміс "Байерін" жаттықтырып келген.

Футболшы кезінде ол 2009-2014 жылдары корольдік клубтың намысын қорғап, Реал Мадрид сапында алты кубокты жеңіп алған.

Хаби Алонсо Бразилия құрамасының бас бапкері атанбақ Карло Анчелоттидың орнын басты. 

Бұған дейін хоккейден финалда АҚШ пен Швейцария әлем чемпионаты кубогын өзара сарапқа салатынын жазғанбыз.