Түркия Нетаньяхуды Газа секторында геноцид жасады деп айыптап, халықаралық сотқа берді
Сурет: pixabay
Бұл туралы елдің билік етуші Әділет және даму партиясының адвокаттары мәлімдеді.
"Бүгін Түркия Республикасы азаматтарының ар-ожданын таныта отырып, біз Гаагадағы Халықаралық қылмыстық сотқа XXI ғасырдың Гитлері - Израиль Премьер-министрі Нетаньяхуға қарсы талап-шағым түсірдік. Ол Газа секторындағы геноцид пен адамзатқа қарсы жасаған барлық қылмыстары үшін сот алдында жауап беруі тиіс", деп жазды адвокат Метин Кюлюнк Х әлеуметтік желісінде.
Ол талап-арыздың бірінші парағын жариялап, оны басқа екі адвокатпен бірге Түркияның Әділет министрлігіне тапсырғанын, ал бұл ведомство оны ары қарай Халықаралық қылмыстық сотқа жолдайтынын нақтылады.
Оның айтуынша, талап-арыз 23 беттен тұрады.
Палестинаның ХАМАС қозғалысының содырлары 2023 жылы 7 қазанда Израильге шабуыл жасады. Олар шекара маңындағы бірнеше елдімекендерді басып алып, 1,4 мың адамды өлтіріп, өзгелерін де кепілге алды. Израильдің қорғаныс армиясы содырларды өз аумағынан тықсыра отырып, Газа секторына қатты соққы берді, оны қоршауға алды. Бірнеше ондаған жылдарға созылған палестиналықтар мен Израиль арасындағы қақтығыстың тағы бір шиеленісі осылайша қанды қырғынға ұласты. Кейіннен ЦАХАЛ Газа секторында жерүсті операциясын жүргізіп, ХАМАС-тың жерасты туннельдерін жойып жатқаны белгілі болды.
Израильдің Газа секторына жасаған соққыларынан қаза тапқандар саны 11 мыңнан асты, 27,4 мыңнан астам адам зардап шекті.
Израиль армиясы ХАМАС содырлары тығылуы мүмкін Газа секторындағы ең үлкен аурухананы қоршауға алғаны хабарланды.
Кейінірек Израиль Қорғаныс министрі ХАМАС қозғалысы Израиль әскери күштерінің жердегі операциясы кезінде Газа секторындағы ықпалын жоғалтты деп мәлімдеді.
