Хамас тұтқынға алынған адамдарды Израильге қайтарудан бас тартты
Сурет: freepik
The Guardian 22 қаңтарда жазғандай, кепілге алынғандарды босату туралы Израиль мен Хамас арасындағы келіссөздер тоқтап қалды. Израиль премьер-министрі Биньямин Нетаньяху ХАМАС-тың Газадан Израиль қорғаныс күштерінің (ЦАХАЛ) әскерлерін толықтай шығаруды қамтитын талаптарын орындаудан үзілді-кесілді бас тартты. Жауап ретінде содырлар тұтқынға алынған израильдіктерді қайтару мүмкіндігін көрмегендерін айтты.
Нетаньяху өз мәлімдемесінде келісім шарттарын қабылдамайтынын, өйткені олар "барлық қанішерлер мен зорлаушылардың босатылуын" және Газа секторындағы Хамастың билігін сақтауды көздейтінін атап өтті.
"Мен ХАМАС құбыжықтары ұсынған тапсыру шарттарын үзілді-кесілді қабылдамаймын", - деді Нетаньяху.
Хамас өкілі Сами Абу Зухридің айтуынша, Нетаньяхудың Газа секторындағы әскери операцияны тоқтатудан бас тартуы "израильдік кепілге алынғандарды қайтару мүмкіндігінің жоқтығын" білдіреді. Палестина тарапының мәліметінше, Газада тұтқынға алынған 130 израильдік қалды.
Израиль премьер-министрінің бұл шешімі ел азаматтары арасында түрлі пікір туғызды. 21 қаңтар күні кешке Иерусалимдегі Нетаньяху үйінің жанында кепілге алынғандардың туыстары наразылық шеруін бастады. Олар премьер-министр кепілге алынғандарды қайтару туралы келісімге келгенше наразылық шараларын жалғастырмақ ниетте.
Хамас пен Израиль арасындағы қақтығыс палестиналық содырлар Израиль шекарасындағы елді мекендерге шабуыл жасаған 2023 жылдың қазанынан бері жалғасып келеді. Израиль Газа секторына жаппай соққы беріп, кейін жердегі операцияны бастады. Артынша тараптар қысқа мерзімді бітімге келіп, одан кейін жанжал қайта жалғасты.
