АҚШ-та дауылдан қаза тапқандар саны 180-нен асты
Сурет: pixabay
Сұрапыл дауыл бір аптаның ішінде оңтүстік шығыс аймақтағы штаттарды астаң-кестең қылды. Қоршаған ортаға және инфрақұрылымға келген шығын шаш-етектен. Каролина мен Джорджияда бір миллионнан аса тұрғын әлі күнге дейін сусыз, ұялы байланыссыз және электр қуатынсыз отыр. Ал, қаза тапқандар саны сәт санап өсіп жатыр. Ақ үй басшылары бүгін ғана дауыл жүріп өткен аймақтарға келіп, қара жамылған отбасыларға көңіл айтты.
"Өңір тұрғындарына айтарым – біз осында сіздермен біргеміз. Қиын сәтте жалғыз тастамаймыз. Алдағы күндері, апталар мен айларда атқарар тиіс жұмыстар көп. Тұрғындар отбасымен қайта табысып, шағын аудандар қайта қалпына келгенше осында боламыз." Камала Харрис, АҚШ вице-президенті, президенттіктен үміткер
Хабар-ошарсыз кеткен жүздеген адам әлі табылмай жатыр. Оларды іздеу көпірлердің қирап, тас жолдарды тасқын судың шайып кетуі себепті оңай болмай тұр. Жалпы, байланыстың үзілуінен мыңдаған адам үйлерінен шыға алмай қалды. Бірақ, еріктілер ебін тауып, мұқтаж тұрғындарға керек-жарақты атпен жеткізуге кірісті. Мәселен, Солтүстік Каролина тауында тұрып жатқан мына қарияларға инсулинін сақтау үшін мұз әкеліп берді.
Апаттан зардап шеккен аймақтарды тікұшақпен көктен шолып шыққан Джо Байден дауылдың салдарын жою үшін әскер жіберетінін айтты. Әзірге мың сарбаз аттандырмақ. Әскерилер азық-түлік, су және басқа да қажетті заттарды жеткізуге көмектеседі. Ақ үй басшысы ғаламдық жылынудың кесірінен мұндай апаттар жиілемесе азаймайды,- деп отыр.
"Климаттық дағдарыстың әсерін ешкім жоққа шығара алмайды. Оны миы өліп қалған адам ғана мойындамайтын шығар. Ғалымдар мұхиттардың жылынуымен Хеленнен де өткен сұрапыл дауылдар көбейе түскенін айтады. Бүгін Солтүстік Каролинада мен соның әсерін көрдім. Ағаштар жаппай тамырымен жұлынып, үйлер іргетасымен бірге қопарылып қалды." Джо Байден, АҚШ президенті
Бір апта бұрын басталған дауыл толастамай тұр. Сондықтан одан келер қауіп әлі де сейілген жоқ, дейді мамандар. Десе де қазірдің өзінде Хелен елдегі соңғы елу жылдағы ең көп өлімге әкелген дауыл болып отыр.
Естеріңізге сала кейік, 2005 жылы АҚШ тарихындағы ең жойқын Катрина дауылы 1 400-ге жуық адамның өмірін қиған еді.
