Мексика түрмесіндегі бүлік жеті адамның өмірін қиды

Мексикада тұтқындар бүлік шығарып, соның салдарынан жеті адам қаза тауып, тағы 11 адам жарақат алды, деп хабарлайды Zakon.kz.

Испанияның La Razon газетінің хабарлауынша, наразылық акциясы 12 сағатқа жуық уақытқа созылған.

"Жеті тұтқын қаза тауып, он бірі жараланды. Тәртіпсіздік тұтқындардың түрменің бірнеше аумағын бақылауға алған "Сомбра" деп аталатын қылмыстық топтың үнемі бопсалауына және агрессиясына қарсы наразылығы ретінде басталды", – делінген хабарламада.

Басылымның хабарлауынша, түрмеде тәртіп орнату үшін ұлттық армия мен полиция жіберілген. Ел билігі оқиғаға кінәлілерді анықтап, егжей-тегжейлі мәлімет беру үшін тергеуді бастағаны хабарланды.

Сарапшылар оқиғаның қарапайым "тұтқындар арасындағы төбелестен" әлдеқайда ауыр екеніне сенімді – бұл кешенді шешімді қажет ететін құрылымдық проблеманы көрсетеді.

Бұған дейін Алматыдағы колониядан екі жасөспірімнің қашып кеткені хабарланған болатын.