Талғат Ластаев бұған дейін ұшу-қону жолағы мен жүру жолын, негізгі таксомотор жолын және аэродромның дренаж жүйесін күрделі жөндеуге 20,3 миллиард теңге қажет болатынын айтқан. Осы орайда журналистер бұл жұмыстың неліктен бюджет есебінен жүзеге асырылуы жоспарланып отырғанын сұрады.
"Астана әуежайы мемлекет меншігінде. Сәйкесінше ұшу-қону жолағын жаңарту мемлекет бюджеті есебінен жоспарланған. Әуежай тарифтері қазіргі шығынды жабады, сәйкесінше жерүсті инфрақұрылымын жаңартуға қосымша қаражат қажет. Біздің тарифтер салыстырмалы түрде арзан. Тарифтер ТМД елдерімен салыстырғанда біздікі ең төменгілердің бірі", - деді ол.
Журналистердің "Күрделі жөндеуге қажет 20 миллиард теңгенің барлығы бюджеттен бөліне ме?" деген нақтылау сауалына Талғат Ластаев "Иә, барлық сома мемлекет бюджеті есебінен жоспарланып отыр" деп қысқа жауап берді.
27 мамырда Астана әуежайының ұшу-қону жолағы жөндеуге байланысты жабылатыны хабарланған еді.
