Ақорданың баспасөз қызметінің хабарлауынша, Мемлекет басшысының жарлығымен 1941–1945 жылдардағы соғыста көрсеткен ерлігі, батылдығы, жанқиярлығы мен соғыстан кейін мемлекеттік және қоғамдық қызметке белсенді қатысқаны үшін Әбдіғали Қаймолдинге және 1941–1945 жылдардағы соғыста көрсеткен ерлігі мен жанқиярлығы үшін Жеңіс Парадының қатысушысы Иван Гапичке "Халық қаһарманы" атағы беріліп, айрықша ерекшелік белгісі – "Алтын жұлдыз" бен "Отан" ордені тапсырылды.
Сурет: akorda
Әбдіғали Қаймолдин – соғыс және еңбек ардагері
1921 жылы 30 маусымда Семей облысы Абыралы ауданы Ұзынбұлақ ауылында дүниеге келген.
1941 жылы әскер қатарына шақырылды.
1941-1945 жылдың 9 мамыры аралығында Сталинград, 1-Украина, 1-Беларусь, 3-Балтық майдандарында шайқасты. 1946 жылдың маусым айында әскер қатарынан босатылған. Аталған қызметтен кейін партияда және мемлекеттік органдарда жұмыс істеді. Әуелі КОКП Семей облыстық комитетінде, содан кейін Жаңасемей, Новопокровск аудандарының атқару комитетінде еңбек етті.
1977-1982 жылдары "Түрксіб" совхозы партия комитетінің хатшысы болып жұмыс істеді және осы жерден құрметті демалысқа шықты. "Қызыл жұлдыз" және І дәрежелі "Отан соғысы" ордендерімен, "Жауынгерлік еңбегі үшін", "Кенигсбергті алғаны үшін", "Германияны жеңгені үшін" медальдарымен марапатталған.
Иван Гапич – соғыс және еңбек ардагері
Сурет: akorda
1923 жылы 2 ақпанда Ақмолада дүниеге келген.
Польшаны, Чехословакияны, Украинаны азат етуге қатысты. Бүкіл соғысты бастан өткерген майдангер фашистердің гарнизондары мен комендатураларын талқандаған, оқ-дәрі және азық-түлік қоймаларын жойған отрядтың жауынгерлік операцияларына қатысқан.
Қызыл жұлдыз және ІІІ дәрежелі Даңқ ордендерімен, "Ерлігі үшін", "Жауынгерлік еңбегі үшін", "Кенигсбергті алғаны үшін", "Германияны жеңгені үшін" медальдарымен, "Прокуратураның құрметті қызметкері" төсбелгісімен, І, ІІ, ІІІ дәрежелі "Ерен еңбегі үшін" медальдарымен, "Құрмет" орденімен, ІІ дәрежелі "Даңқ" орденімен марапатталған.
Батыс Қазақстан облысының құрметті азаматы.
1945 жылы 24 маусымда Қызыл алаңда өткен Жеңіс парадының қатысушысы.
