Бұл бастама Алматы қаласы Жастар саясаты басқармасының қолдауымен Qazaq IT Community серіктестігі аясында жүзеге асырылып, жастарды дамытуға бағытталған.
Жоба аясында алматылық жастар жасанды интеллект технологияларын тегін үйреніп, заманауи AI-құралдарын меңгеріп, оларды оқу, зерттеу және болашақ кәсіби қызметінде қолдана алады. Оқу бағдарламасы машиналық оқыту алгоритмдерін, нейрондық желілердің негіздерін, деректермен жұмыс істеуді және AI-ды түрлі салаларда пайдалануды практикалық түрде оқытуды қамтиды.
"Жасанды интеллекттің дамуы – жай ғана тренд емес, бұл Қазақстанның әлемдік технологиялық аренада белсенді ойыншыға айналуына апаратын болашақтың кілті. Алмалы ауданындағы комьюнити-орталықта ЖИ мектебінің ашылуы – Алматыда мықты IT-қоғамдастық құру жолындағы маңызды қадам. Бұл жерде жастар заманауи технологияларды меңгеріп, озық білімге қол жеткізеді. Біз бұл білімнің жастарға тек болашағы зор мамандықтарды игеруге ғана емес, сонымен қатар инновациялық шешімдерді жасауға көмектесетініне сенімдіміз", – деп атап өтті Qazaq IT Community негізін қалаушы Әсем Болатжан.
Айта кету керек, Алматыда жастарға арналған 11 комьюнити-орталық жұмыс істейді, олар қаланың әр ауданында орналасқан. Әрбір комьюнити-орталық – бұл жастарды қолдауға бағытталған креативті қоғамдық кеңістік. Мұнда мемлекеттік бағдарламалар бойынша кеңес беру, психологиялық және заңгерлік көмек, NEET-жастарға қысқа мерзімді курстар арқылы заманауи мамандықтарды үйрету және жұмыспен қамту шаралары қарастырылған.
"Мен жасанды интеллект технологияларына бұрыннан қызығатынмын, бірақ неден бастарымды білмедім. Осы мектептің арқасында мен заманауи AI-құралдарына қол жеткізіп, оларды оқуымда қолдана бастадым. Бұл – Алматы жастары үшін керемет мүмкіндік!" – деп өз әсерімен алғашқы қатысушылардың бірі, студент Айбек Сарсенов бөлісті.
Оқытуға жазылу үшін жастар Алмалы ауданындағы комьюнити-орталыққа Байтурсынұлы 22к1 мекенжайы бойынша жүгіне алады.