Қаладағы ағаштар мен бұталарға күтім жасаудың жаңа стратегиясы заманауи биофунгицидтерді, биоакарицидтер мен бактериялық препараттарды, сондай-ақ, микротыңайтқыштарды қолдануды көздейді. Мұндай тәсіл қоршаған ортаға түсетін химиялық жүктемені азайтып, табиғи биоәртүрлілікті сақтауға мүмкіндік береді.
"Біз дәстүрлі және биологиялық әдістердің теңгерімді үйлесіміне баса назар аударамыз. Бұл өсімдіктерді зиянкестер мен аурулардан тиімді қорғауға көмектеседі және экожүйе мен қала тұрғындарының денсаулығына төнетін қауіптерді азайтады", – деп атап өтті қалалық экология және қоршаған орта басқармасы.
Естеріңізге сала кетейік, 20 сәуірден бастап Алматыда өсімдіктерді биологиялық өңдеу шаралары басталды.
Жұмыстар түнгі уақытта жүргізіледі және төрт негізгі кезеңнен тұрады:
- I кезең: 20 сәуірден 30 мамырға дейін (емендерді төрт рет, теректерді екі рет өңдеу);
- II кезең: 1 маусымнан 30 маусымға дейін;
- III кезең: 5 шілдеден 5 тамызға дейін;
- IV кезең: 15 тамыздан 20 қыркүйекке дейін.
Өңдеу үшін сертификатталған биологиялық және кей жағдайда төмен қауіп класындағы (П-4) химиялық препараттар қолданылады. Олар ел аумағында қолдануға рұқсат етілген және климаттық факторлар ескерілген, адамдар, құстар мен жануарлар үшін зиянсыз.
Соңғы төрт жылдағы жұмыстардың нәтижелері бойынша бұл препараттар, әсіресе, каштан жапырағы көбелегі, долана және раушан жапырақ ширатқышы сияқты фитофаг зиянкестерге қарсы күресте жоғары тиімділік көрсеткен. Жыл сайынғы жүйелі өңдеу зиянды жәндіктердің санын тұрақты түрде азайтып, қаладағы ағаштардың жай-күйін сақтап тұруға мүмкіндік береді.