Салық органдары астаналықтардың салық берешегіне қатысты ағымдағы сандарды жариялады.
"Елорда тұрғындарының салық берешегінің жалпы сомасы қазірдің өзінде 3 миллиард 581 миллион теңгеден асты. Бұл соманың негізгі бөлігі көлік салығы бойынша – шамамен 3 миллиард 289 миллион теңге. Тағы 292 миллион теңге мүлік салығы бойынша берешек. Берешегі бар салық төлеушілер саны 78 мыңнан асты", – деп хабарлады жұма күні Астана қаласы бойынша Мемлекеттік кірістер департаменті.
Департамент сонымен қатар демалыс маусымының басталуына назар аударды және "салық берешегінің болуы шетелге шығуға шектеу қоюға себеп болуы мүмкін" екенін еске салды.
Келесі ресурстарды пайдалана отырып, қарызды тексеруге болады:
- Мемлекеттік кірістер комитетінің ресми сайты – kgd.gov.kz;
- Электрондық үкімет порталы – egov.kz;
- eSalyq Azamat мобильді қосымшасы.
Елден шығуға тыйым салынғанын eGov.kz порталы немесе eGov мобильді қосымшасы арқылы тексеруге болады.