Жалпы ресейлік балық шаруашылығы және мұхиттану ғылыми-зерттеу институтының Еділ-Каспий филиалының мамандары кейінгі жылдары Каспийде инвазивті түрлердің (жергілікті экожүйеге қауіп төндіретін бөгде түрлер — ред.) саны күрт көбейгенін атап өтті. Бұл құбылыс бөгде түрлердің бассейнге ену жолдарының кеңеюімен және климаттың өзгеруімен байланысты.
Мәселен, 2024 жылы Орта Каспийде фитопланктон сынамаларынан Ceratium tripos var. balticum атты динофитті балдырлардың жаңа түрі анықталған. Ол кезде әр сынамада 3-10 жасуша кездессе, 2025 жылғы сынамаларда бұл көрсеткіш 200 жасушаға дейін жеткен.
Ғалымдар мысал ретінде 1934 жылы табылған өзге бір бөгде балдыр түрін келтірді. Оның ірі көлемі зоопланктоннан қорғануға мүмкіндік берген, ал сол уақытта жергілікті балдырлар белсендірек жойыла бастаған. Жаңа табылған Ceratium tripos var. balticum көлемі жағынан бұдан да асып түседі. Ғалымдар бұл жағдай зоопланктон үшін қолжетімді азық фитопланктонның азаюына және зоопланктон биомассасының қысқаруына алып келуі мүмкін деп қауіптеніп отыр.
"Динoфитті балдырлар жылы маусымда белсенді дамитынын ескерсек, келешекте бұл бөгде түр жасушаларының саны артатыны анық. Жаңа түрді зерттеу және оның Каспий теңізі экожүйесіндегі планктон қауымдастықтарына ықтимал әсерін бағалау келесі экспедициялық зерттеулер аясында жалғасады", - деп түйіндеді зерттеушілер.