Еңбек және халықты әлеуметтік қорғау министрлігінің болжамына сәйкес, 2030 жылға дейін жалпы 883 мың маман қажет болады, оның ішінде 63 мың адам, яғни 7%-ы – агроөнеркәсіптік кешенге арналған.
"Агроөнеркәсіптік кешен мамандарына қажеттіліктің 88%-ын біліксіз немесе жұмысшы кадрлары құрайды, ал 12%-ы – жоғары білімді мамандар", – делінген жауапта.
Сонымен қатар, премьер-министр атап өткендей, ауыл шаруашылығы саласы үшін кадрларды даярлауға арналған мемлекеттік тапсырыс көлемі жыл сайын ұлғайып келеді.
2025 жылы "Ауыл шаруашылығы және биоресурстар" бағытында 3 018 грант қарастырылған, бұл 2024 жылмен салыстырғанда 67 грантқа көп, ал "Ветеринария" бағытында – 1 451 грант, бұл 2024 жылмен салыстырғанда 271 грантқа артық.
"Сонымен қатар, 2021 жылы ауылдық квота көлемі 30%-дан 35%-ға дейін ұлғайтылды. Аграрлық мамандықтар үшін ҰБТ минималды шекті балы 60-тан 50-ге төмендетілді. Сондай-ақ, 2023 жылдан бастап жергілікті атқарушы органдар "Ауыл шаруашылығы және биоресурстар" бағыты бойынша 310 грант және "Ветеринария" бағыты бойынша 92 грант бөлді", – деп қосты Бектенов.
Бұған дейін хабарлағанымыздай, Қазақстанда ауыл шаруашылығы өнімдерін қайта өңдеуге 94 млрд теңге инвестиция бағытталмақ.