Бұл туралы 2026 жылғы 18–20 сәуірге арналған ауа райы болжамында "Қазгидромет" РМК баспасөз қызметі хабарлады, деп жазады Zakon.kz.
Болжамға сәйкес, Скандинавия антициклонының жотасы еліміздің солтүстігінде, шығысында және орталығында жауын-шашынсыз, бірақ салыстырмалы түрде салқын ауа райын сақтайды. Алайда ауа массаларының алмасуына байланысты температураның біртіндеп жоғарылауы күтіледі.
"Елдің батысы мен оңтүстігінде ауа райы тұрақсыз болады – жаңбыр мен найзағай күтіледі, оңтүстік өңірлердің таулы аймақтарында жаңбыр мен қар түрінде жауын-шашын түседі, жел күшейеді. Республика бойынша түнгі және таңғы уақыттарда тұман түсуі мүмкін", – делінген "Қазгидромет" РМК хабарламасында.
Метеорологтардың мәліметінше, күндіз ауа температурасы мынадай деңгейге дейін көтеріледі:
- батыс, солтүстік және орталық өңірлерде – +15…+23°С,
- шығыста – +10…+18°С,
- оңтүстік және оңтүстік-шығыста – +17…+28°С.
2026 жылдың мамыр айында Қазақстанда ауа райы қандай болатыны туралы ақпаратты мына жерден білуге болады.