Қазақстандағы Бала құқықтары жөніндегі уәкіл Динара Зәкиева Facebook желісінде мектеп басшылығының үстінен қылмыстық іс қозғалып, сотқа дейінгі тергеу басталғанын хабарлады. Оның айтуынша, қазір мектепте оқу жылына дайындық сапасын анықтау мақсатында тексеру жүріп жатыр.
Динара Зәкиева қазір жарақат алған баланың жағдайы орташа ауырлықта екенін, жақсару тенденциясы бар, есін білетінін атап өтті. Баланың когнитивтік функциялары бұзылмаған, сұрақтарға жауап беріп, нұсқауларды орындай алады.
Астана полиция департаменті бұл қылмыстық іс бойынша әзірге ақпарат берген жоқ.
Бұған дейін Астанадағы №14 мектеп-гимназияда оқыс жағдай болды: оқушылардың бірі баспалдақтан құлап, ауыр жарақат алды. Астананың білім басқармасы қыркүйектің 25-і күні таңертең баланы баспалдақтан сыныптасы итеріп жібергенде құлағанын хабарлаған. Бала қалалық балалар ауруханасында жатыр, комаға түскен жоқ. Астана қаласының Білім басқармасы елордадағы №14 мектеп-гимназиясында болған атышулы оқиғаға қатысты түсініктеме беріп, мектеп директоры жауапқа тартылуы мүмкін екенін айтқан еді.
