Жамбыл облыстық Полиция департаментінің баспасөз қызметі таратқан мәліметке сәйкес, Жедел басқару орталығының қызметкерлері жалған мемлекеттік тіркеу нөмірлері тағылған Range Rover көлігін анықтаған.
"Тоқтатуға әрекет жасаған кезде Тараздың 38 жастағы тұрғыны патрульдік полиция қызметкерлерінің талабына бағынбай, жол қозғалысы ережелерін бұза отырып қашуға тырысқан", – деп хабарлады полиция 2026 жылғы 21 қазанда.
Ведомство көлікті қуған сәттің видеосын да жариялады.
Осыдан кейін жүргізуші сот отырыстарына бірнеше рет келмеген.
"Мәжбүрлеп жеткізілгеннен кейін ол сот алдында жауап берді. Сот шешімімен әкімшілік қамаққа алынып, көлік құралын басқару құқығынан айырылды", – деп мәлімдеді Полиция департаменті.
Бұған дейін Ақмола облысында ішімдік ішіп, Toyota Alphard көлігінің тізгініне отырған жүргізуші 15 тәулікке қамалып, жеті жылға көлік басқару құқығынан айырылған еді.