Жоғалған чемодандар 1099 теңгеге сатылады: Алматы әуежайы маңызды ақпарат таратты

Қазақстандықтардың назарын Алматы халықаралық әуежайынан жоғалған чемодандарды 1099 теңгеге сату туралы айтылған және күмәнді сілтемесі бар хабарлама аударды. Бұл шынымен де солай ма, деген сауалмен Zakon.kz тілшісі оңтүстік астана әуежайының баспасөз қызметінен сұрап білді.

Алматы халықаралық әуежайы әлеуметтік желілерде таралған жоғалған жүктер сатылымына қатысты ақпарат шындыққа жанаспайтынын хабарлады.

"Алматы әуежайы ешбір сатылымдар мен аукциондарды өткізбейді. Мұқият болып, алаяқтардан сақ болыңыз!" Алматы халықаралық әуежайының баспасөз қызметі

Айта кетейік, Астана әуежайы да 2024 жылдың қазан айында осындай жағдайға тап болған болатын. Артынша, астаналық әуежайдың атынан алаяқтар қойманы жоғалған жүктерден тазарту үшін сату туралы хабарландыру жариялаған. Ал бұл багажды сатып алу үшін сілтеме бойынша өтіп, 1060 теңге төлеу керек болды.