189 қазақстандық "Болашақ" стипендиясының иегері атанды

"Болашақ" халықаралық бағдарламалар орталығы стипендиаттардың толық тізімін жариялады. Шетелде кадрлар даярлау жөніндегі республикалық комиссияның шешімімен 189 қазақстандық халықаралық стипендия иегері атанды, деп хабарлайды Zakon.kz.

2025 жылы конкурс кешенді тестілеу мен жеке әңгімелесуді қамтитын кезеңдік іріктеудің жаңа ережелері бойынша өткені белгілі.

"Жаңа стипендиаттардың жалпы санынан 164 адам магистратурада, 10 адам докторантурада оқиды, ал 15 қазақстандық "әлемнің үздік университеттері мен орталықтарында" кәсіби тағылымдамадан өтеді", – деп хабарлады орталық.

Халықаралық стипендия жеңімпаздарының тізімін мына сілтемеден табуға болады.

"Болашақ" – Қазақстан Республикасы Президентінің халықаралық білім беру стипендиясы. Бағдарламаның мақсаты – ел экономикасының басым секторлары үшін кадрлар мен мамандарды даярлау, қайта даярлау және біліктілігін арттыру. Бағдарлама жоғары оқу орындарында ғылыми дәреже алуды да, әлемнің жетекші компаниялары мен университеттерінде ғылыми және өндірістік тағылымдамадан өтуді де қамтиды.

2025 жылғы 22 мамырда Конституциялық сот "Болашақ" бағдарламасын аяқтағаннан кейін Қазақстанда жұмыс істеу заңға сәйкес азаматтық-құқықтық шарттың шарты болып табылатынын түсіндірді.