LRT президентке апарады деп сенген: Қазнетті тәнті еткен балаға Тоқаев қалай үн қатты
Сурет: Астана әкімдігі
Желіде LRT-мен алғаш рет жүрген кішкентай баланың видеосы кеңінен тарады. Ол пойыз өзін Қасым-Жомарт Кемелұлына апарады деп сенген. Алайда сапар соңында ол президентті көре алмайтынын түсініп, көңіл күйіп түсіп кетеді.
Бұған қоса, оған Ақорда резиденциясына да кіре алмайтынын түсіндіргенде, кішкентай Әміренің мұңы одан сайын үдей түсті. Оның шынайы қалауы мен көз жасы көпшілікті бейжай қалдырмады.
@iliyas_tustikbayev 🙌🏻Мүмкін көріп қалар, мүмкін жауап алар, мүмкін кездесіп те қалар… #тоқаев #қасымжомарт #әміре ♬ оригинальный звук – Iliyas Tustikbayev
Нәтижесінде баланың арманына бір қадам жақындауына мүмкіндік жасалды – оған президенттен арнайы сәлемдеме жолданды. Жеңіс Қасымбек президенттің тапсырмасымен 3 жастағы Әміреге арнайы сыйлық табыстады.
Сурет: Астана әкімдігі
"Халықаралық балаларды қорғау күні LRT-ға алғаш мінген сәті түсірілген бейнероликтің кейіпкері – үш жасар Әміремен кездестім. Қазақстандықтардың көбісі Әміренің LRT оны ел Президентімен кездесуге апаратынына шынайы сенген видеосын тамашалады. Оның балалық аңғалдығы, кіршіксіз көңілі мен қарапайымдылығы көпшілікті баурап алды. Мемлекет басшысының тапсырмасы бойынша Әміреге Қазақстан Республикасы Президентінің Алғыс хатын, сондай-ақ естелік сыйлықтар табыстадым. Мұндай сәттер арманыңа қанат бітіріп, жақсылыққа сенуді, өмірдің әрбір қарапайым сәтіне балаша қуана алу қасиетін жоғалтпау керектігін тағы бір мәрте еске салады. Мына әлемді балалардың пәк күлкісі мен шынайы сезімі нұрландыра түседі!" – деп жазды Жеңіс Қасымбек желідегі парақшасында.
Астана әкімі Әміреге мықты денсаулық, армандарының орындалғанын және шаттыққа толы бақытты балалық шақ тіледі.
Бұған дейін Халықаралық балаларды қорғау күнінде бір топ оқушы Ақорданы аралап көргенін жазғанбыз.
