Астана әуежайына қону кезінде Scat ұшағының шассиі бүлінген

14 наурызда Шымкенттен ұшып шыққан Scat әуе компаниясына тиесілі ұшақтың шассиіне Астана әуежайына қону кезінде зақым келді. Бұл туралы Zakon.kz елордалық әуе айлағының баспасөз қызметіне сілтеме жасап хабарлайды.

"12:21-де Шымкент – Астана бағыты бойынша DV715 рейсін орындаған Scat әуе компаниясының ӘК B737-800 ұшағы қонғаннан кейін ұшу-қону жолағында бөгде заттардың пайда болғаны туралы ақпарат келіп түсті. Белгіленген рәсімдерге сәйкес әуежай қызметтері ұшу-қону жолағын (ҰҚЖ) жедел қарап, тексеру жүргізді. Тексеру барысында ұшу-қону жолағынан ұшақ шассиінің пневматикалық (авиашинасының) бөліктері табылып, олар алынды. Әуе айлағы элементтеріне залал келген жоқ", - деді баспасөз қызметі.

Үшу-қонуды орындаған ұшақты тексеру кезінде Scat әуе компаниясының инженерлік-техникалық құрамы ұшақ шассиінің сол жақ тірегінің зақымданғанын анықтағаны атап көрсетіледі.

"Бұл ақпарат Азаматтық авиация саласындағы уәкілетті ұйымға жолданды. Аталған оқиға әуежайдың ұшу-қону операцияларына әсер еткен жоқ. Әуежай штаттық режимде жұмыс істеп жатыр", - деп түсіндірді әуежайдағылар.

Бұған дейін үздіксіз жауған қар мен ақтүтек боранға байланысты Алматы әуежайы жұмысын уақытша тоқтатқаны хабарланған болатын.