Төрт күнде 150 мың хабарлама: Астанада SMS-бластер қолданған топ әшкереленді

Астанада қала прокуратурасының үйлестіруімен қазақстандықтардың дербес деректері мен ақшасын иемдену мақсатында жаппай фишингтік хабарламалар таратқан топтың қызметі әшкереленді, деп хабарлайды Zakon.kz.

Елорда прокуратурасы 2026 жылғы 20 тамызда істің мән-жайын жариялады.

"Биыл қаңтарда Оңтүстік-Шығыс Азия елдерінің бірінің азаматы ақшалай сыйақы ұсынып, Қазақстан аумағында заңсыз әрекетті ұйымдастыру үшін жергілікті тұрғынды тартқан. Қылмыстық схемаға жабдықтың жұмысын қамтамасыз еткен басқа да адамдар қатысқан", – делінген хабарламада.

Қадағалау органының мәліметінше, күдіктілер ұялы байланыстың базалық станциясына ұқсатып жасалған және байланыс операторларының сүзгілеу жүйелерін айналып өтіп, хабарламаларды жаппай таратуға мүмкіндік беретін SMS-бластер құрылғысын пайдаланған.

"Төрт күн ішінде Beeline, Kcell және Activ операторларының абоненттеріне танымал компаниялардың атынан бонустарды айырбастау туралы ұсыныспен 150 мыңға жуық фишингтік SMS-хабарлама жіберілген. Сілтемеге өткен қолданушылар жалған сайтқа бағытталып, оларға дербес және банк деректерін, оның ішінде төлем картасының деректемелерін, CVV-код пен SMS арқылы келген растау кодын енгізу ұсынылған", – деп хабарлады Астана прокуратурасы.

Осылайша, күдіктілер азаматтардың құпия ақпараты мен банктегі қаражатына қол жеткізген.

"Қазақстанның Қаржылық мониторинг агенттігі SMS-бластерді тәркіледі. Сараптама қорытындысы құрылғының жедел-іздестіру іс-шаралары мен жасырын тергеу әрекеттерін жүргізуге арналған арнайы техникалық құрал екенін көрсетті. Қылмыстық іс ҚР Қылмыстық кодексінің 399-бабы 2-бөлігі – "Ақпаратты жасырын алуға арналған арнайы техникалық құралдарды заңсыз әзірлеу, өндіру, сатып алу, өткізу немесе пайдалану" бойынша тергеліп жатыр", – делінген прокуратура хабарламасында.

Төрт күдікті қамауға алынды. Сотқа дейінгі тергеп-тексеру жалғасып жатыр.

ҚР Қылмыстық-процестік кодексінің 201-бабына сәйкес өзге ақпарат жария етілмейді.

Бұған дейін, 2026 жылғы 19 тамызда Астана прокуратурасы басқармасының прокуроры Талант Қалиев алаяқтардың қазақстандықтарды қалай алдайтынын айтып, ең көп таралған тәсілдерді атаған еді.