Қазақстанда күн суытып, аяз 18 градусқа дейін күшейеді

"Қазгидромет" синоптиктері 2026 жылғы 14–16 қарашаға арналған ауа райы болжамын жариялады, деп хабарлайды Zakon.kz.

Алдағы үш күнде Қазақстанның басым бөлігінде жаңбыр мен қар жауады. Тек Қызылорда облысында жауын-шашынсыз ауа райы күтіледі.

15 қарашада елдің батысында қатты жаңбыр жауады. Ал 16 қарашада Батыс Қазақстан облысында мол жауын-шашын түседі: жаңбыр мен қар жауады.

"Ел аумағында жел күшейіп, көктайғақ болады. Түнде және таңертең тұман түседі", – деп хабарлады "Қазгидрометтің" баспасөз қызметі.

Өңірлердегі ауа температурасы айтарлықтай ерекшеленеді: кей жерлерде аяз 18 градусқа дейін күшейсе, кей аймақтарда күндіз 15 градусқа дейін жылы болады.

• Батыста түнгі ауа температурасы +2…+8°С-тан +6…+11°С-қа дейін жоғарылайды. 16 қарашада −2…+3°С-қа дейін төмендейді. Күндіз +8…+13°С-тан +1…+8°С-қа дейін салқындайды.
• Оңтүстік-батыста түнде ауа температурасы +4…+9°С-тан +5°С-қа дейін, күндіз +10…+15°С-тан +5…+10°С-қа дейін төмендейді.
• Солтүстік-батыста түнде −3…+3°С болады. Күндіз ауа температурасы +2…+9°С-тан +4…+11°С-қа дейін жоғарылайды.
• Солтүстікте түнде −5…+2°С күтіледі. Күндіз ауа температурасы −2…+3°С-тан 0…+5°С-қа дейін көтеріледі. Павлодар облысында түнде −3…−8°С-қа, күндіз −2…+3°С-қа дейін төмендейді.
• Орталықта түнде 2–10 градус аяз, күндіз −3…+5°С болады.
• Шығыста түнгі ауа температурасы 1–8 градус аяздан 6–13 градус аязға дейін төмендейді. Күндіз −5…+3°С күтіледі.
• Оңтүстікте түнде −5…+3°С болады. Күндіз ауа температурасы +5…+12°С-тан +7…+15°С-қа дейін жоғарылайды.
• Оңтүстік-шығыста түнде аяз 1–6 градустан 5–10 градусқа дейін, таулы аудандарда 9–14 градустан 13–18 градусқа дейін күшейеді. Күндіз ауа температурасы +2…+10°С-тан +8°С-қа дейін төмендейді. Таулы аудандарда күндізгі аяз 1–6 градустан 3–8 градусқа дейін күшейеді.

Бүгінгі, 13 қарашадағы қолайсыз ауа райы туралы келесі сілтемеден оқуға болады.