Жамбыл облысында екі оқушының өліміне қатысты тергеу жүріп жатыр

Жамбыл облысы Қордай ауданындағы Қаракемер ауылында екі жасөспірімнің мәйіті табылды, деп хабарлайды Zakon.kz.

Әлеуметтік желілерде 2026 жылғы 15 сәуірде тараған ақпаратқа сәйкес, екі 9-сынып оқушысының денесі таңертең бір қорадан табылған. Алдын ала деректер бойынша, жасөспірімдер өз-өзіне қол жұмсаған болуы мүмкін. Қайтыс болғандар әртүрлі отбасынан шыққан.

Жамбыл облыстық полиция департаментінің мәліметінше, аталған дерек бойынша қылмыстық іс қозғалған.

"Қазіргі уақытта оқиғаның барлық мән-жайын толық, жан-жақты және объективті анықтауға бағытталған қажетті тергеу әрекеттері жүргізілуде. Қазақстан Республикасы Қылмыстық-процестік кодексінің 201-бабына сәйкес, өзге ақпарат тергеу мүддесіне байланысты жария етілмейді", – делінген полиция хабарламасында.

Айта кетейік, бұған дейін Шымкент қаласында 8-сынып оқушысының өз-өзіне қол жұмсағаны туралы хабарланған болатын.