"Шымкентте қарақұрттар адамдарға шабуылдай бастады" деген ақпаратты жергілікті билік жоққа шығарды.
"Қазіргі таңда қарақұрттардың шағу жағдайы қала ішінде тіркелген жоқ, олар көбінесе таулы аймақтарға (маевкаға) шығу кезінде орын алуда. Зардап шеккендер қаладағы медициналық мекемелерге жүгінеді", – делінген түсініктемеде.
Санитарлық қызметтің мәліметі бойынша, қазіргі уақытта Шымкент қаласының ішінде қарақұрттың шағу жағдайлары тіркелмеген. Егер өрмекшінің шағуы қала ішінде орын алса, санитарлық-эпидемиологиялық қызмет оқиға орнын анықтап, қажетті өңдеу жұмыстарын жүргізеді.
Еске салсақ, былтыр бір Атырау облысының өзінде маусым-шілде айларында 485 бас түйе малын қарақұрт шағып, салдарынан 90 бас шығын болды. Симптоматикалық емдеу шаралары нәтижесінде 306 бас жануар сауығып, 89 бас малға әлі де емдеу жүргізілуде. Өлген мал иелеріне 65 млн 211,2 мың теңге шығын келтірілген болатын.