"СОЦИС-А" қоры Zakon.kz тапсырысы бойынша Құрылтай сайлауында экзитпол өткізеді

2026 жылғы 23 тамызда "Кешенді әлеуметтік зерттеулер институты – Астана" ("СОЦИС-А") жеке қоры Құрылтай депутаттарын сайлау қорытындысын алдын ала анықтау мақсатында әлеуметтанулық зерттеу жүргізеді, деп хабарлайды Zakon.kz.

Қоғамдық пікірді зерттеу мақсатындағы сауалнама еліміздегі 200 сайлау учаскесінде "exit poll" әдісімен жүргізіледі.

Зерттеу нәтижелері Қазақстан Республикасы заңнамасының талаптарына сәйкес 2026 жылғы 24 тамызда жарияланады.

Құрылтай депутаттарының сайлауы алдағы жексенбі, 23 тамызда өтеді. Сайлаушылар тізіміне 12 млн 605 мың 788 азамат енгізілген.

Сайлау барысында қазақстандықтар бес жыл мерзімге Құрылтайдың 145 депутатын сайлайды. Орталық сайлау комиссиясы жеті саяси партиядан ұсынылған Құрылтай депутаттығына кандидаттардың партиялық тізімдерін тіркеді.

Алдағы тарихи Құрылтай сайлауы туралы толық ақпаратты осы жерден оқи аласыз.